ແຂວງສາລະວັນ ຕ້ອນຮັບການມາຢ້ຽມຢາມ ແລະ ເຮັດວຽກຂອງ ທ່ານ ຄຳໄຕສີ ພັນດອນ ອະດີດປະທານພັກ, ປະທານປະເທດແຫ່ງ ສປປ ລາວ.

ໃນວັນທີ 14 ທັນວາ 2018 ທີ່​ຜ່ານ​ມາ, ​ແຂວງ​ສາລະ​ວັນ​ໄດ້​ຕ້ອນຮັບ ທ່ານ ຄຳໄຕສີ ພັນດອນ ອະດີດປະທານພັກ, ປະທານປະເທດແຫ່ງ ສປປ ລາວ ທີ່ມາເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງສາລະວັນ ​ເຊິ່ງໃຫ້​ກຽດ​ຕ້ອນ​ຮັບ​​ໂດຍ ​ທ່ານ ສີ​ສຸວັນ ວົງ​ຈອມ​ສີ ກຳມະການ​ສູນ​ກາ​ງພັກ, ​ເລຂາ​ພັກ – ​ເຈົ້າ​ແຂວງ ສາລະ​ວັນ ພ້ອມ​ຄະນະ.​ໃນ​ໂອກາດ​ມາ​ຢ້ຽມຢາມ​ແຂວງ​ສາລະ​ວັນ​ຄັ້ງນີ້, ທ່ານ ຄຳ​ໄຕ ສີ​ພັນ​ດອນ ກໍ​ໄດ້​ໃຫ້​ກຽດ​ພົບ​ປະ​ໂອ້​ລົມ ຄະນະພັກ – ຄະນະ​ນຳ​ຂອງແຂວງ, ​ຄະນະ​ພັກ 8 ເມືອງ, ກໍາລັງປະກອບອາວຸດ, ພະນັກງານ​ຫຼັກ​ແຫຼ່ງອ້ອມ​ຂ້າງ​ແຂວງ ​ແລະ ເມືອງສາລະວັນ, ​ເຊິ່ງມີ​ຜູ້ເຂົ້າຮ່ວມຮັບ​ຟັງ​ການ​ໂອ້​ລົມທັງໝົດ 546 ທ່ານ, ຍິງ 150 ທ່ານ. ​ເຊິ່ງທ່ານ​ ກໍ​ໄດ້ສະ​ແດງ​ຄວາມ​ຍ້ອງຍໍ​ຊົມ​ເຊີຍ​ຕໍ່​ຄະນະ​ພັກ – ຄະນະ​ນຳ​ຂອງ​ແຂວງ ​ແລະ ພະນັກງານ ຫຼັກ​ແຫຼ່ງທຸກ​ພາກສ່ວນ ທີ່​ໄດ້​ຊີ້​ນຳ ​- ນໍາພາ ​ສ້າງສາ ​ແລະ ພັດທະນາ​ແຂວງ​ສາລະ​ວັນ ຈົນ​ມີ​ຜົນສຳ​ເລັດ​ເປັນ​ກ້າວໆ ມາ, ບົນ​ພື້ນຖານ​ແນວ​ຄິດ​ໄກສອນ​ ພົມວິຫານ ກໍ​ຄື​ອຸດົມ​ການ​ຂອງ​ພັກ, ຂອງ​ປະ​ຊາ​ຊົນ​ລາວ​ທັງ​ຊາດ ​ເພື່ອ​ນຳພາ​ປະ​ເທດ​ຊາດ​ໄປ​ສູ່​ສັງຄົມ​ນິຍົມ. ສະນັ້ນ, ​ເພື່ອ​ເປັນ​ທິດ​ທາງ​​ໃຫ້​ແກ່​ການ​ສືບ​ຕໍ່ນຳພາສ້າງ​ສັງຄົມ​ນິຍົມ ທີ່​ເປັນ​ສີສັນ​ສະ​ເພາະ​ຂອງ​ລາວ​ໃນ​ຕໍ່ໜ້າ ທ່ານ​ໄດ້​ໃຫ້​ຄຳ​ເຫັນ​ວ່າ​: “ ຕ້ອງ​ເລີ່​ມ ຈາກ​ການ​ສ້າງ​ປະຖົມ​ປັດ​ໄຈ​​ແຕ່​ຮາກ​ຖານ​ຂຶ້ນ​ມາ”. ​ໂດຍທ່ານ​ໄດ້​ເນັ້ນໜັກ 3 ບັນຫາ​ໃຫ່ຍຄື:

– ການສ້າງປະຖົມ​ປັດ​ໄຈ​ສັງຄົມ​ນິຍົມ​ແຕ່​ຮາກ​ຖານຂຶ້ນ​ມາ;
– ການ​ສ້າງ​ເມືອງ​ໃຫ້​ເປັນ​ຫົວໜ່ວຍ​​ເຂັ້ມ​ແຂງ​ຮອບດ້ານ;
– ການ​ສ້າງ​ແຂວງ​ໃຫ້​ເປັນ​ຫົວໜ່ວຍ​ຍຸດ​ທະ​ສາດ.
​​ໂດຍ​ຖື​ເອົາ​ບັ້ນກະກຽມ​ກອງ​ປະຊຸ​ມ​ໃຫ່ຍ 3 ຂັ້ນຂອງ​ພັກ ​ດຳ​ເນີນ​ການຈັດຕັ້ງ​ເຊື່ອມ​ຊຶມ​ເນື້ອ​ໃນ​ດັ່ງ​ກ່າ​ວ​ໃຫ້​ເລິກ​ເຊິ່ງ, ສ້າງ​ໃຫ້​ໄດ້​ ບ້ານ​ຕົວ​ແບບ ​ແຕ່ 8 – 10 ບ້ານ ​ເພື່ອ​ຂະຫຍາຍ​ກວ້າງ​ອອກ​ໃນ​ທົ່ວ​ແຂວງ. ຕ້ານ ​ແລະ ສະກັດ​ກັ້ນການ​ຂູດ​ຮີດ, ​ເອົາ​ລັດ​ເອົາ​ປຽບ, ການ​ແບ່ງ​ຊັ້ນ – ​ແບ່ງ​ຂັ້ນ​ໃນ​ສັງຄົມ ​ແລະ ການ​ຫຼົງ​ໄຫຼ​ນຳ​ກົນ​ໄກ​ເສດຖະກິດ​ຕະຫຼາດ​ທຶນ​ນິຍົມ ທີ່​ເຫັນ​ແຕ່ດ້ານ​ກຳ​ໄລ, ຜົນ​ປະ​ໂຫຍ​ດກຸ່ມ​ກ້ອນ ຈົນ​ລືມ​ຄຳ​ໝັ້ນສັນຍາ​ ທີ່​ມີ​ຕໍ່​ປະຊາຊົນ ວ່າ​ຈະ​ເຮັດ​ທຸກ​ຢ່າງ​ເພື່ອ​ປະຊາຊົນ, ​ໃຫ້​ປະຊາຊົນ​ມີ​ຄວາມສຸກ​ກ່ອນ, ພະນັກງານ​ຈິ່ງ​ສະ​ໜຸກຕາມ​ຫຼັງ, ຈະງ່ຽງ​ຫູ​ຟັງຄວາມ​ຄິດ​ເຫັນ​ປະຊາຊົນ. ສະນັ້ນ, ​ໃນ​ຕໍ່ໜ້າພະນັກງານ – ສະມາຊິກ​ພັກ​ຕ້ອງ ​ໄດ້​ເພີ່ມ​ທະວີ ຄວາມ​ເປັນ​ແບບຢ່າງ ​ເພື່ອສ້າງ​ຄວາມ​ເຊື່ອ​ໝັ້ນຂອງ​ປະຊາ​ຊົນ​ຕໍ່​ພັກ ​ແລະ ການ​ປະຕິວັດ.

Leave a Reply

Your email address will not be published. Required fields are marked *