ທ່ານຮອງນາຍົກເນັ້ນຫຼາຍວຽກງານສຳຄັນໃຫ້ແຂວງຈຳປາສັກເອົາໃຈໃສ່ຫຼາຍດ້ານ

ທ່ານ ປອ ສອນໄຊ ສີພັນດອນ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ແຫ່ງ ສປປ ລາວໄດ້ເນັ້ນໃຫ້ອຳນາດການປົກຄອງແຂວງຈຳປາສັກໃຫ້ເອົາໃຈໃສ່ຫຼາຍວຽກງານທີ່ສຳຄັນ ໃນໂອກາດທີ່ທ່ານລົງມາຢ້ຽມຢາມ ແລະ ເຮັດວຽກຢູ່​ແຂວງ​ຈຳປາ​ສັກໃນວັນທີ 15 ສິງຫາ 2016 ນີ້ທີ່ຫ້ອງວ່າການປົກ ຄອງແຂວງດັ່ງກ່າວ. ໃຫ້ກຽດຕ້ອນຮັບໂດຍທ່ານ ປອ ບຸນຖອງ ດີວິໄຊ ກຳມະການສູນກາງພັກ ເລຂາພັກແຂວງ ເຈົ້າແຂວງໆຈຳປາສັກ, ພ້ອມຄະນະນຳຂັ້ນສູງຂອງແຂວງ ​ແລະ ​ເມືອງ.ໃນໂອກາດດັ່ງກ່າວກ່ອນອື່ນ ທ່ານ ປອ ບຸນຖອງ ດີວິໄຊ ໄດ້ຂຶ້ນລາຍງານໂດຍຫຍໍ້ກ່ຽວກັບການຊີ້ນຳໆພາ,ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ກໍ່ຄືການຜັນຂະຫຍາຍມະຕິ X ພັກ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງ. ຫຼັງຈາກນັ້ນພະນະທ່ານ ປອ ສອນໄຊ ສີພັນດອນ ກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ທາງອົງຄະນະພັກແຂວງຈຳປາສັກຍາດມາໄດ້. ພ້ອມທັງໄດ້ເນັ້ນໃຫ້ຄະນະພັກອຳນາດການປົກຄອງແຂວງສືບຕໍ່ເອົາໃຈໃສ່ວຽກງານສຳຄັນຫຼາຍດ້ານເປັນຕົ້ນ: ສືບຕໍ່ຮັບປະກັນສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ຄວາມເປັນລະບຽບຮຽບຮ້ອຍ. ຊຸກຍູ້ການເຕີບໂຕທາງດ້ານເສດຖະກິດໃຫ້ໄດ້ຢ່າງຕໍ່ເນື່ອງ, ໂດຍສະເພາະແມ່ນສູ້ຊົນເອົາໃຈໃສ່ແກ້ໄຂບັນຫາທາງດ້ານການເງິນ,ການຈັດເກັບລາຍຮັບງົບປະມານ ໃຫ້ໄດ້ຕາມແຜນ. ເບິ່ງຄືນທ່າ ແຮງບົ່ມຊ້ອນດ້ານຕ່າງໆທີ່ເຫັນວ່າເປັນຖານລາຍຮັບເຊັ່ນ: ກວດສອບໄມ້ ຕາມໂຮງງານ, ໄມ້ເຂົ້າມາບໍ່ຖືກລະບຽບແມ່ນໃຫ້ກັກຢຶດ ແລ້ວປະມູນຂາຍ ໂດຍສົມທົບກັບພາກສ່ວນທີ່ກ່ຽວຂ້ອງເພື່ອເກັບເຂົ້າໃນລາຍຮັບຂອງແຂວງ. ໄປພ້ອມກັບການກວດກາການຈັດຕັ້ງປະຕິບັດຄຳສັ່ງ ເລກທີ 15/ນຍ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ ແລະ ກວດກາການຂຸດຄົ້ນໄມ້, ເຄື່ອນຍ້າຍໄມ້ ແລະ ທຸລະກິດໄມ້ ຢູ່ແຂວງຈຳປາສັກ ໃຫ້ເຂົ້າສູ່ລະບຽບ, ນອກຈາກການສຶກສາອົບຮົມແລ້ວ ຕ້ອງເພີ່ມມາດຕາການທາງດ້ານການບໍລິຫານດ້ວຍການກັກຢຶດ ແລະ ປັບໃໝ. ບັນຫາທີ່ດິນເຊິ່ງເປັນຖານລາຍຮັບທີ່ມີທ່າແຮງ ແລະ ຍັງມີເງື່ອນໄຂສູງໃນການຈັດເກັບລາຍຮັບ ໃຫ້ຜູ້ຮັບຜິດຊອບວຽກງານດັ່ງກ່າວປະສານສົມທົບກັບພາກສ່ວນທີ່ກ່ຽວຂ້ອງ ເພື່ອເກັບກຳຂໍ້ມູນສະຖິຕິການນຳໃຊ້ທີ່ດິນໃຫ້ຖືກຕາມເປົ້າໝາຍການນຳໃຊ້ ເພື່ອສະດວກໃນການເກັບພາສີທີ່ດິນ. ແກ້ໄຂບັນຫາເລື່ອງລະບົບມອບເໝົ່າການນຳເຂົ້າ ແລະ ສົ່ງອອກຂອງພາກສ່ວນທຸລະກິດຄ້າຂາຍ ເພື່ອອັດຊ່ອງຫວ່າງການເສຍຜົນປະໂຫຍດຂອງພາກລັດໃນການເກັບຄ່າທຳນຽມພາສີ,ອາກອນ.

ພ້ອມ​ນີ້ທ່ານ ປອ ສອນໄຊ ສີພັນດອນ ຍັງ​ໄດ້​ເນັ້ນໃຫ້ແຂວງຈຳປາສັກສືບຕໍ່ຈັດຕັ້ງເຊື່ອມຊຶມມະຕິ X ຂອງພັກ ຕິດພັນກັບການດຳເນີນຊີວິດການເມືອງໃຫ້ເລິກເຊິ່ງ. ເອົາໃຈໃສ່ໃນການກໍ່ສ້າງສະມາຊິກພັກ, ພະນັກງານ ໂດຍຖືເປັນວຽກງານທີ່ສຳຄັນທີ່ຕັດສິນຜົນສຳເລັດຂອງທຸກວຽກງານ. ໃນໂອກາດດັ່ງກ່າວ 2 ບໍລິສັດໃຫຍ່ພາຍໃນແຂວງຍັງໄດ້ມອບເງິນຈໍານວນໜຶ່ງໃຫ້ແຂວງຈໍາປາສັກປະກອບມີ: ບໍລິສັດດວງດີກໍ່ສ້າງມອບເງິນຈຳນວນ 100 ລ້ານກີບ ແລະ ກຸ່ມບໍລິສັດຕັງຈະເລີນ 50​ ລ້ານກີບ. ພ້ອມນັ້ນຫ້ອງວ່າການສຳນັກງານນາຍົກລັດຖະມົນຕີ ຍັງໄດ້ມອບ ຄອມພິວເຕີໂນດບຸກຈຳນວນ 5 ເຄື່ອງໃຫ້ກັບຫ້ອງວ່າການແຂວງຈຳປາສັກຕື່ມອີກ.

ຈາກ​ນັ້ນ ​ໃນ​ຕອນ​ແລງ​ຂອງ​ວັນ​ດຽວ​ກັນ​ທ່ານ​ຮອງ​ນາຍົກລັດຖະມົນຕີກໍ່ຍັງ​ໄດ້​ສືບ​ຕໍ່​ເຄື່ອນ​ໄຫວ​ລົງ​ຕິດຕາມ​ຊຸກ​ຍູ້​ການ​ຜະລິດ​ເຂົ້ານາ​ປີ​ຂອງ​ຊາວ​ກະສິກອນ​ຢູ່​ເມືອງ​ຊະນະ​ສົມບູນ​ນຳ​ອີກ.

ພາບ ແລະ ຂ່າວ: www.champasack.gov.la

Leave a Reply

Your email address will not be published. Required fields are marked *